Оштогу өзгөчө оор кылмыштын бетин толук ачууга багытталган комплекстүү иш-чаралар уланууда

Ош шаарындагы өзгөчө оор кылмыштын бетин толук ачууга багытталган комплекстүү иш-чаралар уланууда. Бул тууралуу SUPER.KG порталына Ички иштер министрлигинин басма сөз кызматынан билдиришти.

Маалымдалгандай, 13-январга караган түнү саат 01:15 чамасында Ош шаарынын Курманжан датка көчөсүндө белгисиз адамдар бир адамды өлтүрүп, экинчисинин денесине оор залал келтиришкен. Андан соң кол салгандар унаа менен качып кетишкен.

Бул факты боюнча Кылмыш-жаза кодексинин 37-122-беренесинин (Адам өлтүрүүгө аракет кылуу) негизинде кылмыш иши козголгон.

Ички иштер министринин орун басары Нурбек Абдиев жеринде өзгөчө оор кылмышка тиешеси бар адамдарды кармоо боюнча тергөө-ыкчам тобунун ишин координациялоодо.

Учурда кылмышкерлердин төртөө кармалды.

Кылмыш ишинин алкагында шектүүлөрдүн жана алардын жакындарынын даректеринде тинтүү иштери жүргүзүлүп, автоунаалар жана унаалардагы жүргүнчүлөр текшерилүүдө.

Автор: Максуда Кудайбердиева
Фото: Ички иштер министрлиги