Ысык-Көлдөн 24 килограмм гиряга байланып чөктүрүлгөн аялдын сөөгү табылды

Ысык-Көлдөн 24 килограмм гиряга байланып чөктүрүлгөн аялдын сөөгү табылды. Бул тууралуу ИИМдин басма сөз кызматы билдирди.

Маалыматка ылайык, жергиликтүү тургундар 7-сентябрь күнү Ысык-Көлдөн (Тору-Айгыр менен Чырпыкты айылдарынын ортосунда) азиат түспөлүндө, 30-35 жаштагы аялдын сөөгү сууга калкып чыкканын байкашкан. Алгач күтүлбөгөн кырсыктан чөгүп кетти деп ойлошкону менен, кийинчерээк бутуна жип байланганын көрүшкөн. Суудан алып чыкканда аял 24 килограмм гиряга байлнып чөктүрүлгөнү белгилүү болгон.

Ысык-Көл ОИИББи тарабынан КР Кылмыш-жаза кодексине ылайык “адам өлтүрүү” беренеси боюнча кылмыш иши козголгон. Денеси сууда жатып шишип кеткендиктен, маркумду таануу мүмкүн болгон эмес.

Бир нече экспертизадан кийин ноябрь айынын аягында Балыкчы шаарынын тургуну, 1987-жылы туулган Махабат Сарбагышева экени аныкталган. 3 айдан кийин шектүү деп Ысык-Көл облустук ички иштер башкармалыгынын тергөө бөлүмүнүн кызматкерлери тарабынан Балыкчы шаарынын тургуну, 1979-жылы туулган А.Т. кармалган.

Алдын ала божомолдорго караганда, өлтүрүүгө пикир келишпестик себеп болгон. Көрсөтмөлөр боюнча, кармалган бала менен кыздын урушу 28-августта Кеминде башталган. Кызды муунтуп салган соң БМВ үлгүсүндөгү унаасына салып үйүнө алып келген. Ал жерден 24 килограмм гиря менен жипти алып көлгө алып барган. Жээктен 10 метр алыс жерге чөктүрүп, окуя болгон жерден кетип калган.

Бир жумадан кийин денеси суунун бетине чыгып калбагандыгын текшерүү үчүн келген. Кыздын сөөгү 10 күндөн кийин көлдүн бетине калкып чыккан.

Туугандары маркумду тааныган соң сөөгү жерге коюлган. Азыркы тапта кылмыш иши боюнча иликтөө иштери жүрүүдө.

Автор: Айпери Ганыжан кызы