"Баасы 1 миллион 700 миң сом". Жалал-Абадда Өзбекстанга мыйзамсыз мал ташып өтүүгө аракет кылгандар кармалды (фото)

Жалал-Абадда чек арадан мыйзамсыз мал ташып өтүүгө аракет кылгандарга бөгөт коюлду. Бул тууралуу Чек ара кызматынан билдиришти.

Чек ара кызматы 9-февралдан 13-февралга чейинки аралыкта Ала-Бука чек ара отрядынын чек арачылары тарабынан бир нече мыйзамсыз майда жандыктарды, бодо мал жана жылкыны айдап өтүү фактылары токтотулганын билдирди.

Маалыматка ылайык, 9-февраль күнү Жалал-Абад облусуна караштуу Аксы районунун Чаласарт тилкесинде нөөмөт учурунда чек ара кезмети тарабынан Кыргыз Республикасынын жарандары 1983-жылы туулган Н.У., ошондой эле унааны мыйзамсыз башкарууга аракет кылган 1988-жылы туулган Б.Э. Кыргызстандан Өзбекстанга андан ары сатуу үчүн 92 баш майда мал жандыкты алып өтүүгө аракет кылышкан.

Ошол эле күнү кечинде Ала-Бука районунун Актам конушунун четине жакын жерден чек ара кезмети Кыргызстандын 3 баш бодо малын Өзбекстанга мыйзамсыз айдап келе жаткан 1979-жылы туулган К.Ж. аттуу жаранды кармашкан.

Эртеси, 10-февралда Аксы районунун Таза-Суу аймагында чек ара кезмети тарабынан Өзбекстандан Кыргызстанга жылкы алып өтүүгө аракет кылган 1989-жылы туулган Кыргыз Республикасынын жараны Н.Б. кармалган.

12-февралда Аксы районунун Чаласарт тилкесинде чек ара кезмети тарабынан 6 баш бодо малды Өзбекстанга мыйзамсыз алып өтүүгө аракет кылган Кыргыз жараны, Аксы районунун Олонбулак айылынын 1974-жылы туулган Т.У. аттуу тургуну кармалган.

Алдын ала маалыматтар боюнча, кармалган майда жандыктын, бодо малдын жана жылкынын баасы 1 миллион 700 миң сомдон ашкан.

Аталган фактылар боюнча тиешелүү документтер толтурулгандан кийин кармалган жарандар, майда жана ири мүйүздүү малдар кошумча иликтөө иштерин жүргүзүү үчүн компетенттүү органдардын кызматкерлерине өткөрүлүп берилди.

Автор: Алина Айдарбекова