Тажикстанда кар көчкүдөн 10 адам каза болду

Тажикстанда 15-февралдагы кар көчкүнүн кесепетинен 10 адам каза болду. Бул тууралуу аталган өлкөнүн өкмөтүнө караштуу Өзгөчө кырдаалдар жана жарандык коргонуу комитети билдирди.

Маалымдалгандай, Хорог шаарында сегиз жергиликтүү тургун набыт болуп, 22 турак үй талкаланды.

Ал эми Дүйшөмбү-Варзоб унаа жолунун 65,8-чакырымында кар көчкү алдында калган 4 унаанын биринин айдоочусу да көз жумган.

Ванж районунда болсо кар көчкү астында калып, Техарв шаарынын тургуну каза болгон. Анын сөөгүн жергиликтүү эл таап, туугандарына өткөрүп беришкен.

Тажикстандын президенти Эмомали Рахмон кар көчкүдөн жабыркаган Бадахшандын тургундарына тез жардам көрсөтүүнү тапшырганын өлкө башчынын маалымат кызматы билдирди.

Тажикстандын синоптиктери республиканын тоолуу аймактарында кар көчкү жана таш түшүү коркунучу 19-февралга чейин сакталарын эскертишти.

Автор: Максуда Кудайбердиева