Өлкө аймагынан оор кылмыштарды жасашкандыгы үчүн издөөдө жүргөн чет өлкөлүк жарандар кармалды

Оор кылмыштарды жасашкандыгы үчүн издөөдө жүргөн чет өлкөлүк жарандар Кыргызстандан кармалышты. Бул тууралуу ИИМден билдиришти.

Маалыматка ылайык, Ички иштер министрлигинин Кылмыш иликтөө башкы башкармалыгынын издөө бөлүмүнүн ыкчам кызматкерлери тарабынан оор кылмыштарды жасашкандыгы үчүн издөөдө жүрүшкөн Орусия Федерациясынын жарандары кармалды.

Бишкек шаарынын жана Чүй облусунун аймагынан Орусия Федерациясынын Кылмыш-жаза кодексинин 162-беренесинин 4-бөлүмүндө (Каракчылык), 209-беренесинин 2,3-бөлүмдөрүндө (Бандитчилик) көрсөтүлгөн кылмыштарды жасашкандыгы үчүн издөөдө жүрүшкөн Орусия Федерациясынын жарандары 1988-жылы туулган А.К. менен 1986-жылы туулган Ч.Ж. кармалышкан.

Экөөнө тең 2016-жылы мамлекеттер жана эл аралык издөө жарыяланган. Жогоруда көрсөтүлгөн жарандар уюшкан кылмыштуу топтун курамында Орусия Федерациясынын Бурятия Республикасынын калк жыш жайгашкан пунктарында жана Улан-Удэ шаарынын аймагында күйүүчү май куюучу жайларга жана дүкөндөргө бир нече жолу каракчылык менен кол салууга айыпталышууда.

Орусиянын укук коргоо органдары эки жаран тең Кытайда же Монголияда туугандарында жашырынып жүрүшү мүмкүн деп болжолдошкон. Бирок экөө тең Кыргызстандын аймагынан табылды.

Азыркы учурда кармалган жарандар камакка алынды. Жакынкы арада аларды экстрадициялоо маселелери чечилет.

Автор: Алина Айдарбекова
Фото: Ички иштер министрлигинин басма сөз кызматы