Ошто такси айдоочусун бычактап кетишти

Ош облусунда такси айдоочусун бычактап өлтүрүп, унаасын айдап кетишкен. Бул тууралуу Ош облустук ички иштер башкармалыгынын басма сөз кызматы билдирди.

Билдирүүгө ылайык, 25-февраль күнү саат 21:20 чамасында милицияга Кара-Суу районунун Фуркат айылында белгисиз азият түспөлүндөгү 35-40 жаш курактагы эркек кишинин жансыз денеси жаткандыгы кабарланган. Аталган факты боюнча милиция кызматкерлери барышып, кылмыш иши козголгон.

Алгачкы текшерүүнүн жүрүшүндө 25-февраль күнү саат 20:31 чамасында Кара-Суу районунун Шарк айыл аймагынын Медресе айылынын тургуну, 37 жаштагы Ж.Ж. аттуу жарандын үйүнө белгисиз жаран жаракат алып, оор абалда келгендиги аныкталган. Ыкчам-иликтөөнүн жүрүшүндө каза болгон жарандын өздүгү аныкталды.

Аталган факты боюнча маркумдун жансыз денесине сырттан кароо жүргүзүлүп, соттук-медициналык экспертиза дайындалган. Жүргүзүлгөн иш-чаралардын жыйынтыгында маркумга тиешелүү ак түстөгү Хонда-Фит үлгүсүндөгү унаасы Ош шаарынын Салиева көчөсүнөн табылган.

Учурда кылмышка шектүүлөрдү кармоо боюнча ыкчам-издөө иш-чаралары уланууда.

Автор: Азат Бейшенбеков