"Камчыбек Ташиев өзү көзөмөлгө алат". Сузакта заманбап төрөт үйүнө капсула салынды

Жалал-Абад облусунун Сузак районуна караштуу Барпы айыл өкмөтүндө 75 орунга ылайыкташылган заманбап төрөт үйү курулат. Бул тууралуу бүгүн, 6-мартта Өзгөчө кырдаалдар министрлигинен билдирди.

Маалыматка ылайык, бүгүн капсула салуу аземи болуп, ага УКМК төрагасы Камчыбек Ташиев, Жогорку Кеңештин депутаты Айбек Маткеримов, президенттин Жалал-Абад облусундагы ыйгарым укуктуу өкүлү Абсаттар Сыргабаев, ӨКМнын Жалал-Абад облусу боюнча башкармалыгынын башчысы Абдулнасир Закиров катышты.

"Курулушка жеке ишкерлер тарабынан 270 миллион сом акча бөлүнүп, жергиликтүү бийлик тарабынан 3 гектар жер аянты даярдалган, курулуш иштерин ӨКМнын Жалал-Абад облусундагы өзгөчө кырдаалдарга чара көрүү боюнча механикалаштырылган базасы жүргүзөт", - деп айтылат маалыматта.

Төрөт үйү ушул жылдын аягына чейин курулуп бүтөрү жана Камчыбек Ташиев бул иштин жүрүшүн тыкыр көзөмөлгө аларын баса белгилегени кошумчаланды.

Автор: Бек Оморбеков
Фото: ӨКМдин басма сөз кызматы