Ошто мурда соттолгон жарандар алдамчылыкка шектелип кармалды

Ош шаарында мурда соттолгон жарандар алдамчылыкка шектелип кармалды. Бул тууралуу бүгүн, 9-мартта Ош ШИИБинен билдирди.

Маалыматка ылайык, 1997-жылы туулган Ж.А. жана 1993-жылы туулган М.М. аттуу жарандар кармалышты. Алар Ош шаарынын аймагынан февраль-март айларында "убактылуу жашаганга батир беребиз" деп жарандарды алдап, 6 миӊ сомдон 15 миӊ сомго чейинки акчаларын алдын ала алышып, из жашырып жүрүшкөн.

"Батир издеген жарандарды түрдүү рекламалык сайттардан, гезиттерден таап, өздөрү батир сунушташкан. Алдын ала акчасын алган соӊ түрдүү даректерден ачкычты алууну айтышып, изин жашырып кетишкен. Мисалы, жабырлануучу бир аялдан 13 миӊ сом алган соӊ үйдүн ачкычын дүкөндө иштеген сатуучуга берип койгондугун, барып алып, үйгө кире берерин айтып алдаган", - деп айтылат маалыматта.

Бүгүнкү күндө бул кылмыштуу топтон жабыркаган 6 жабырлануучудан арыз келип түшкөн. Шектүүлөр 7-мартта кармалышып убактылуу кармоочу жайга киргизилген.

Милиция бул жарандардан жабыркагандар болсо 102 жана 0554-41-02-02 телефондоруна байланышка чыгып коюуну өтүнөт.

"Убактылуу батир алууда өтө сактык менен мамиле жасап, батир берүүчү адам жана батир тууралуу толук маалымат алган соӊ гана акчаларын бериӊиздер! Батир берүүчү болуп, алдап кетишкен шылуундардан сак болуӊуздар!" - деп кошумчалады милициядан.

Автор: Бек Оморбеков
Фото: Ош ШИИБ