Ошто милиция кызматкери "Көк бөрүдөн" уткан унаасын мамлекетке берди (фото)

Ош шаарында милиция кызматкери улак тартыш оюнунан утуп алган унаасын милициянын нөөмөт бөлүмүнө берди. Бул тууралуу Ош шаардык ички иштер башкармалыгынан билдиришти.

Ош шаардык ички иштер башкармалыгынын №3 милиция бөлүмүнүн начальниги, милициянын капитаны Асхат Субанов улуттук улак тартыш оюнунда ВАЗ 2107 үлгүсүндөгү унаа утуп алган. Ал уткан унаасын Ак-Буура милиция бөлүмүнүн нөөмөт бөлүмүнө берди. Ал бул кадамын "Коомдук коопсуздукка кошкон салымым болсун" деп түшүндүрдү.

"Мен февраль айында кезектеги эмгектик эс алууда жүргөн учурумда улак тартыш улуттук оюндарына катышып, 2 унаа уттум. Ошол экөөнүн бирин өзүм иштеген Ак-Буура милиция бөлүмүнүн нөөмөт бөлүмчөсүнө берүүнү чечтим. Бул оюмду ата-энем дагы кубаттап, колдоп беришти", - деген Асхат Субанов.

Бул унаа эми Ош ШИИБнин карамагына өтүп, тиешелүү документ жана мамлекеттик номур ыйгарылат.

Автор: Азат Бейшенбеков