"Туулган күнүмдү куттукташса, ыңгайсыз боло берем" дейт 31 жашка чыккан актёр Самат Эркинбек уулу

Бүгүн, 16-мартта тамашоучу, актёр Самат Эркинбек уулу 31 жашка чыкты. Ал 1992-жылы Токмок шаарында туулган. Күлкү жаратуучунун өздүк майрамы менен куттуктап, ага байланышка чыктык.

“Азырынча майрамдык маанай сезиле элек. Негизи эле туулган күнүм менен куттукташса, ыңгайсыз боло берем. Өзүмдүн туулган күнүмө анчейин маани бере бербегендиктен башкалардын туулган күнүн дагы унутуп калам.

Жубайым биринчи болуп куттуктады. Азырынча белек ала элекмин. Былтыр туулган күнүмдү жакындарымдын курчоосунда тоском. Быйыл эл менен тосом. Себеби, бүгүн элдин жакшылыгында кызмат кылам”, - дейт актёр.

Эскерте кетсек, Самат Эркинбек уулу “Супер-Инфо” гезитинин тандоосу боюнча “2012-жылдын супер күлкү жаратуучусу” наамын алган. Ал 2007-2008-жылдары “Тамашоу” долбооруна “Ак-Өргө City” командасынын атынан катыша баштаган. “Тамашоудон” сырткары өзүн актёрлук жаатта сынап, “Мачо”, “До+Фа”, “Көк Салкын”, “Пентхаус”, “Браво”, “Гонщик таксист” тасмаларында роль жараткан.

Актёр мырза 2017-жылы 21-июлда сүйүктүүсү Чолпонайга баш кошуп, 2022-жылы 29-октябрда уулдуу болушкан.

16-марттын жылнаамасы.

Автор: Жаңыл Ниязбекова