Гаагадагы эл аралык сот Владимир Путинди камакка алууга ордер берди

Гаагадагы Эл аралык кылмыш соту Орусиянын президенти Владимир Путин менен Орусиянын балдардын укуктары боюнча акыйкатчысы Мария Львова-Белованы камакка алууга ордер берди. Мындай маалымат соттун расмий сайтына жарыяланды.

Билдирүүгө ылайык, Путин менен Львова-Белова "Украинанын оккупацияланган аймактарынан Орусия Федерациясынын аймагына калкты (балдарды) мыйзамсыз депортациялоо менен байланышкан согуш кылмыштары үчүн жооптуу" деп айтылат.

"Путин мырза жогоруда аталган кылмыштар үчүн түздөн-түз, башкалар менен биргелешип же башка адамдар аркылуу аракеттерди жасагандыгы үчүн, ошондой эле жарандык жана аскерий кол алдындагыларга тиешелүү көзөмөл жүргүзбөгөндүгү үчүн жекече кылмыш жоопкерчилигине тартылат деп айтууга жүйөлүү негиздер бар", - деп айтылат билдирүүдө.

Буга чейин Бириккен Улуттар Уюмунун иликтөө комиссиясы украиналык балдарды Орусияга алып кетүү согуш кылмышы катары каралышы мүмкүн экенин билдирген.

Автор: Азат Бейшенбеков