"Үйүнөн бир кап марихуана табылган". Жалал-Абадда баӊгизат сатууга шектүү жаран кармалды

Жалал-Абадда баӊгизатын сатууга шектүү жаран кармалды. Бул тууралуу бүгүн, 27-мартта облустук милициядан кабарлады.

Маалыматка ылайык, 17-мартта саат 23:40 чамасында Токтогул районунун аймагынан аталган райондун тургуну 1972-жылы туулган А.У. ширеӊке кутучасынын формасындагы 10 даана кара күрөӊ түстөгү өзгөчө кескин жыты бар затты жана 1 литрлик банкага салынган “марихуанага” окшогон затты сатып жаткан жеринен кармалган. Ошондой эле өз ыктыяры менен өзү жашаган үйдөн 1 капка салынган “марихуанага” окшогон затты тапшырган.

"Жалал-Абад ОИИБинин криминалистикалык кызматынын корутундусуна ылайык, кара күрөӊ түстөгү өзгөчө кескин жыты бар зат 74 грамм “гашиш” баӊгизаты, 1 литрлик банкага салынган зат 178 грамм “марихуана” баӊгизаты жана 1 капка салынган зат 7 килограмм “марихуана” баӊгизаты экендиги аныкталды", - деп айтылат маалыматта.

Бул факты боюнча Кылмыш-жаза кодексинин 282-беренесинин (Баңгизат каражаттарын, психотроптук заттарды жана алардын аналогдорун сатып өткөрүү максатында мыйзамсыз даярдоо) негизинде кылмыш иши козголгон.

Кылмышка шектүү убактылуу кармоочу жайга киргизилгени жана учурда тергөө амалдары улантылып жатканы кошумчаланды.

Автор: Бек Оморбеков
Фото: Жалал-Абад ОИИБ