Бишкекте кардарлар менен веб-моделдерди байланыштырып турган вебкам студия табылды (фото)

Бишкекте кардарлар менен веб-моделдерди байланыштырып турган вебкам студия табылды. Бул тууралуу Ички иштер министрлигинен билдиришти.

Маалыматка ылайык, Бишкек шаарында компьютердик клуб катары иштеп келген белгилүү бир “студиянын” дареги аныкталып, ал жерди ыкчам кызматкерлер текшерүүгө алган. Документтер боюнча бул дарек жубайларга катталган. Үйдүн 1-кабатындагы чоң бөлмөдөн 8 компьютер, дагы бир бөлмөдөн 10 компьютер табылган. Андан сырткары, 2-кабатта жана жер төлөдө компьютер бар экендиги аныкталган.

Бул мекемеде болжол менен 20-25 жаштагы азиат түспөлүндөгү 7-8 жигит котормочу болуп иштеп жүргөн. Алар модель менен потенциалдуу кардардын ортосундагы ортомчулар экени такталган.

Ошол эле учурда компьютердин бет маңдайында отурган веб-моделдер менен сайттарга кирген кардарлар башка шаарда, атүгүл башка өлкөдө болушу мүмкүн. Бул учурда операторлор кошулуп, котормочу болуп, веб-моделдин ордуна келгендер менен видео чатта баарлашып жүрүшкөн. Кардарды азгырып, көбүрөөк төлөп берүү да котормочулардын негизги милдети экени маалым болду.

Жумушчулардын айтымында, бул турак жайдын ижара акысы ай сайын 700 долларды түзөт. Учурда иликтөө иштери уланууда. Жалпысынан көрсөтүлгөн даректен 30 компьютер табылган.

Автор: Жаңыл Ниязбекова