Кызыл-Кыяда "Хизб-ут-Тахрир" уюмунун 4 жетекчиси кармалды

Баткен облусунун Кызыл-Кыя шаарында "Хизб-ут-Тахрир" диний-экстремисттик уюмунун 4 жетекчиси кармалды. Бул тууралуу УКМКнын басма сөз кызматынан билдиришти.

Маалыматка ылайык, экстремисттик идеологияны жайылтуу максатында диний сабактарды өтүп, диний уюмдун мүчөлөрүнүн чогулуштарын ай сайын уюштуруп келген "Хизбут-Тахрир" диний-экстремисттик уюмунун 4 жетекчиси кармалган.

Алардын жашаган жерин тинтүү учурунда көп сандагы экстремисттик адабияттар жана тиешелүү материалдар сакталышы мүмкүн болгон электрондук приборлор табылды.

Белгилей кетсек, экстремисттик уюмдун жетекчилери 2023-жылдын 12-апрелинде Кызыл-Кыя шаарында Кылмыш-жаза кодексинин 314-беренеси (Экстремисттик уюм түзүү) боюнча сотко чейинки өндүрүштүн алкагында кармалган.

Учурда тиешелүү ыкчам-иликтөө иш-чаралары жүргүзүлүүдө.

Автор: Жаңыл Ниязбекова