УКМК бюджетке дагы 100 миллион сом кайтарылганын билдирди

Мамлекеттик салык кызматындагы коррупция фактысы боюнча бюджетке 100 миллион сом кайтарылды. Бул тууралуу Улуттук коопсуздук мамлекеттик комитетинин басма сөз кызматы билдирди.

УКМКнын 19-апрелде тараткан маалыматына ылайык, салык кызматынын системасындагы коррупциялык фактыларды иликтөөдө 10 салык инспектору жана жеке ишканалардын 3 жетекчиси кармалган.

"Тергөөнүн жүрүшүндө инспекторлор “Ф” тобундагы компаниялардын өкүлдөрү менен алдын ала сүйлөшүп алып, бюджетке иш жүзүндө төлөнүүгө тийиш болгон салыктардын суммасын бир нече эсе төмөндөтүп, 3 миллион 300 миң сом өлчөмүндө гана салыктарды төлөшкөн.

Жүргүзүлгөн ыкчам-иликтөө иш-чараларынын натыйжасында келтирилген зыян 100 миллион сом экени аныкталып, өлкө бюджетине толук кайтарылды", - деп жазылат маалыматта.

Ошондой эле бул кылмыш иши боюнча тергөө иштери уланып, тергөө амалдарынын жүрүшү жана жыйынтыгы тууралуу коомчулукка маалымдалып турары кабарланат.

Автор: Каныкей Амантаева