"Жоокер" тасмасы эл аралык кинофестивалда баш байгени жеңип алды

Режиссёр Аманбек Ажыматтын "Жоокер" тасмасы Япониядагы эл аралык "Meihodo" кинофестивалында баш байгени утуп алды. Бул тууралуу "Кыргызфильм" улуттук киностудиясы билдирет.

Маалыматка ылайык, "Meihodo" кинофестивалына жалпы 122 өлкөдөн 3 533 тасма катышып, анын ичинен 19 тасма мыкты деп табылган. Жыйынтыгында режиссёр Аманбек Ажыматтын "Жоокер" тасмасы "Алтын байге" сыйлыгын (кошумча 10 миң доллар) жана Гран-прини (кошумча 5 миң доллар) жеңип алган.

Белгилей кетсек, сыйлыктын жеңүүчүлөрү 28-апрелде Япониянын Кюсю шаарына пландаштырылган оффлайн аземинде жарыяланып, 30-апрелде YouTube каналында көрсөтүлгөн. Анда Аманбек Ажыматты жана башка бардык финалисттерди "Баары, бардык жерде" тасмасындагы ролу үчүн "Оскар" сыйлыгын алган малайзиялык актриса Мишель Йео тосуп алган.

Аземде режиссёрдун "Жоокер" тасмасы үчүн сыйлыктарды алып, ошондой эле NFT кубокторуна жана сертификаттарына ээ болду.

Автор: Жаңыл Ниязбекова