Москвада кыргыз жигити мекендешинин интимдик сүрөттөрүн таратам деп акча талап кылган. Ал кармалды

Москвада мекендешинен системалуу түрдө опузалап акча талап кылган деген шек менен кыргызстандык кармалды. Бул тууралуу Ички иштер министрлигинин басма сөз кызматы билдирди.

Маалымдалгандай, ушул жылдын 24-апрелинде ИИМдин Орусиядагы өкүлчүлүгүнө 21 жаштагы Кыргыз жараны кайрылган. Ал мурунку жигити жеке материалдарын тактап айтканда, интим сүрөттөрүн таратам деп коркутуп, көптөн бери акча талап кылып жүргөнүн айткан.

Арызында 2022-жылдын ноябрь айынан тарта ай сайын акча которуп турган, бирок чыдай албай жардам сурап кайрылганын билдирген.

Бул факты каттоого алынып, иликтөө иштери башталган. Анын натыйжасында 28-апрелде милиция кызматкерлери кылмышка шектүү 2001-жылы туулган Д.Р. аттуу кыргызстандыкты кармаган.

Алдын ала маалыматтар боюнча, шектүү мурдагы сүйлөшкөн кызынан 66 миң рубль алган.

Автор: Максуда Кудайбердиева