"Издөөдө жүргөн". Ошто тургундардын унааларын сатып акчасын бербей жүргөн жаран кармалды

Ошто тургундардын унааларын сатып акчасын бербей изин жашырып жүргөн жаран кармалды. Бул тууралуу Ош ШИИБинин басма сөз кызматы маалымдайт.

"Шектүү Ноокат районунун 1997-жылы туулган тургуну З. Достонбек кармалды. Ал 2022-жылдан бери издөөдө жүргөн. Ага карата 2022-жылы 22-декабрда Ош шаардык соту тарабынан камакка алуу боюнча сырттан өкүм чыккан", - деп айтылат маалыматта.

Шектүү Ош шаарынын жана Ош облусунун аймактарынын тургундарына таандык кымбат баалуу автоунааларды "кымбат сатып берем" деп алып, саткан соӊ акчасын ээсине бербестен изин жашырып кеткен. 4 жабырлануучу милицияга арыз менен кайрылган, бирок жабырлануучулар мындан дагы көп болушу мүмкүн.

Учурда шектүү убактылуу кармоочу жайга киргизилип, 209-берене (алдамчылык) боюнча тергөө иштери уланууда.

Жабыр тарткан жарандар болсо Ош шаардык милициясынын 03222-4-25-36 жана 0550-89-89-24 номерине кайрылса болот.

Автор: Жаңыл Ниязбекова