Ошто мыйзамсыз курал сактаган кылмыштуу топ кармалды (фото)

Ош шаарында мыйзамсыз курал сактаганга шектелип кылмыштуу топтун мүчөлөрү кармалды. Бул тууралуу Ош ШИИБинин басма сөз кызматы маалымдайт.

Маалыматка ылайык, 15-майдан 16-майга караган түнү мыйзамсыз курал алып жүргөнгө шектүү кылмыштуу топ Ош шаарына батыш тараптан кире берүүчү жол айлампасынан кармалды. Алардын Мерседес-Бенц үлгүсүндөгү автоунаасынан АКСУ-74У үлгүсүндөгү автомат (магазининде 4 огу бар болгон), 1 даана тапанча (магазинде 3 огу бар) алынган. Кармоо учурунда кылмыштуу топ милиция кызматкерлерине каршылык көрсөтүшүп, качууга аракет жасашкан.

"Кылмыштуу топтун мүчөлөрү Жалал-Абад облусунун Аксы районунун тургуну 1996-жылы туулган Ө. уулу Т., Ош облусунун Өзгөн районунун тургуну 1993-жылы туулган А. уулу Э. жана Ош облусунун Кара-Суу районунун тургуну 1994-жылы туулган Ш.Т. кармалып, Ош ШИИБине алып келинди", - деп айтылат маалыматта.

Учурда алгачкы тергөө амалдары жүрүп жатат. Кармалгандардын баары мурда бир нече жолу сот жообуна тартылган жарандар экени маалымдалды.

Автор: Жаңыл Ниязбекова