Бишкекте студенттик хор коллективдери арасында кароо-сынак фестивалы өтөт

Бишкекте Кыргыз ССРнин эл артисти, биринчи хормейстер Султан Юсуповдун 105 жылдыгына карата Студенттик хор коллективдери арасында II республикалык кароо-сынак фестивалы өтөт. Бул тууралуу Маданият министрлигинен кабарлашты.

Белгилүү болгондой, иш-чарага жети облус жана 2 шаардан 600 адамдан турган 12 хор коллективи катышат. Кароо-сынактын тандоо туру 23-май күнү саат 11:00дө Калый Молдобасанов атындагы улуттук консерваториясында болот.

Ал эми сыйлоо аземи 24-май күнү саат 18:00дө Тарых музейинин алдында болуп, гала-концерт менен коштолот. Фестивалга катышкан бардык хор топтору Бишкек шаарынын конокторуна жана тургундарына концерттик программа тартуулашат. Анда кыргыз жана дүйнөлүк композиторлорунун чыгармаларын аткарышат.

Иш-чара коомчулуктун хор искусствосуна болгон кызыгуусун арттыруу, ошондой эле эл чыгармачылыгын, аткаруучу чеберчиликти, улуттук маданиятты өнүктүрүүгө жана өз мүмкүнчүлүктөрүн ишке ашырууга багытталган.

Белгилей кетсек, кароо сынак фестивалынын байге фонду 1 миллион сомду түзөт.

Автор: Айжанар Рыспек кызы
Фото: Улуттук маданий борбор