"Каракол" аэропортунун жетекчилигине кылмыш иши козголду

Ысык-Көл облусунун Каракол шаарындагы "Каракол" аэропортунун кызматкерлерине кылмыш иши козголду. Бул тууралуу УКМК кабарлады.

Маалыматка ылайык, аэропорт жетекчилигине Кылмыш-жаза кодексинин 210-беренеси (Ишенип берилген мүлктү ыйгарып алуу же коротуу) боюнча кылмыш иши козголуп, тергөө амалдары жүрүп жатат.

"Жүргүзүлгөн ыкчам-издөө иш-чараларынын жүрүшүндө «Каракол» аэропортунун кызмат адамдары жеке кызыкчылыгын көздөп, аэропорттун атайын техникасын жана жабдууларын, баалуу металлдарды чыгарып алган адамдарга мыйзамсыз сатып жибергендиги аныкталган. Ошентип көрүлгөн чаралардын жана уруксат берилген издөөлөрдүн жыйынтыгы боюнча Каракол шаарында алтынды аффинаждоочу жер астындагы лаборатория табылган, кийин ал тиешелүү профилдеги экспертизанын корутундусу менен тастыкталган", - деп билдиришти УКМКдан.

Учурда бул иш боюнча тергөө иштери уланууда.

Автор: Азат Бейшенбеков