Бишкекте акыркы коңгуроо үчүн акча чогултууга тыюу салынат

Бишкек шаарында акыркы коңгуроо салтанатына байланыштуу кечки жана түнкүсүн майрамдык иш-чараларды өткөрүүгө тыюу салынат. Бул тууралуу калаа бийлигинен кабарлашты.

Маалымдалгандай, бардык мектептерде акыркы коңгуроо салтанаты 25-майда өтөт.

"Иш-чаралар акысыз өткөрүлүп, мугалимдерден жана мектептерден акча чогултууга, ошондой эле кечки жана түнкүсүн майрамдык иш-чараларды өткөрүүгө тыюу салынат" дешти мэриядан.

Мындан тышкары, мэрия 25-майда билим берүү башкармалыгынын жана райондук билим берүү борборлорунун кызматкерлеринин күнү-түнү нөөмөтү уюштурулуп, Бишкектин укук коргоо органдары күчөтүлгөн режимде кызмат өтөөрүн маалымдады.

“Жалпы билим берүү уюмдарынын жетекчилери жалпы билим берүү уюмдарынын аймагынан тышкары жерде өткөрүлгөн
майрамдык иш-чараларда окуучулардын өмүрү жана ден соолугу үчүн алардын жоопкерчилиги жөнүндө ата-энелерге маалымат берүү менен чогулуштарын өткөрүштү.

Мектептер тарабынан мыйзам бузуулар аныкталган учурда директорго, жетекчилерди ээлеген кызматынан бошотууга чейин тартиптик чаралар көрүлөт” – деп билдирди мэриядан.

Автор: Гүлкайыр Бабаева
Фото: Интернеттен алынды