Ошто акыркы коңгуроодон кийин унаа айдап бара жаткан окуучулар кармалды (фото)

Ош облусунун аймагында акыркы коңгуроо аземинен кийин окуучулар автоунаа айдап бара жаткан жеринен кармалды. Бул тууралуу облустук милициядан билдиришти.

"Эскертүүлөргө карабастан Кара-Суу жана Ноокат районунун окуучулары акыркы коңгуроодон кийин автоунаа айдап бара жаткан жеринен кармалды.

Жалпы 4 унаа токтотулуп, алардын экөө Кара-Суу, экөө Ноокат районунун окуучуларынын башкаруусунда экени аныкталды. Унаа башкарып бара жаткан бүтүрүүчүлөрдүн айдоочулук күбөлүгү жок болгондуктан жол кыймылынын коопсуздугун камсыздоо бөлүмүнүн кызматкерлери тарабынан протоколдор түзүлүп, 4 автоунаа айып короого киргизилди", - деп жазылат маалыматта.

Белгилей кетсек, окуучулардын коопсуздугу үчүн облустук кызматкерлер тарабынан эс алуучу жайларга баруучу жолдордун бардыгына атайын күзөттөр коюлган.

Автор: Жаңыл Ниязбекова