"Контрабандага колдоо көрсөткөн". Жалал-Абадда чек ара жана милиция кызматкерлери кармалды

Контрабандага колдоо көрсөткөн Аксы РИИБинин жана чек ара кызматынын жооптуу кызматкери кармалды. Бул тууралуу бүгүн, 29-майда УКМКнын басма сөз кызматы билдирди.

Маалыматка ылайык, Аксы районунун чек ара кызматынын жана ички иштер органдарынын жооптуу кызматкерлеринин ишмердүүлүгүн текшерүүнүн жыйынтыгында Аксы РИИБнин жана чек ара заставаларынын жетекчилеринин аткезчиликке катыштыгы бар экендиги аныкталган.

"Чек ара заставаларынын жайгашкан жерлеринде, Аксы райондук милиция кызматкерлеринин жана айрым жарандардын даректеринде ыкчам тинтүү иштери жүргүзүлүп, анын жыйынтыгында ири суммадагы акча каражаты, контрабандалык товарларды өткөрүп берүү жөнүндө жазуулар, ошондой эле жөнөтүүгө даярдалып турган эл керектөөчү товарлар жана бодо малдар табылды", - деп айтылат маалыматта.

Мындан сырткары, чек ара кызматынын атайын дрондорун колдонуу менен мүмкүн болгон контрабанда жолдорун текшерүү учурунда мамлекеттик чек араны мыйзамсыз кесип өтүүгө аракет кылган учурда жалпы суммасы 1 миллион 200 миң сомдук 31 коробка тамеки буюмдарын ташып бара жаткан унаа кармалды.

Иликтөөнүн жыйынтыгында Аксы РИИБнин үч кызматкерине, анын ичинде башчынын орун басары А.И. менен чек ара кызматынын заставаларынын 3 командирине аткезчиликти уюштуруу жана колдоо кылгандыгы үчүн айып тагылгандыгы кошумчаланды.

Автор: Жаңыл Ниязбекова