Чүйдө бөтөлкөлөшүн бычактаган жаран кармалды

Аламүдүн районунда бөтөлкөлөшүнө бычак сайган жаран кармалды. Бул тууралуу бүгүн, 30-майда Чүй ОИИББинен билдиришти.

Маалыматка ылайык, 28-майда Аламүдүн РИИБине Бишкек шаарындагы улуттук хирургия борборунан 1999-жылы туулган К.Б. аттуу жаран бычактан оор жаракат алгандыгы маалымдалган.

Бул факты боюнча Кылмыш-жаза кодексинин 280-берене (бейбаштык) менен кылмыш иши козголгон.

Тергөө амалдарынын жүрүшүндө 28-майда жабырлануучуну Аламүдүн районундагы Ак-Жар жаңы конушунда “А” аттуу жаран менен спирт ичимдигин ичип отуруп, ортодо чыккан уруштан улам бөтөлкөлөшү аны 2 жолу бычак менен сайып, качып кеткени аныкталган.

Жүргүзүлгөн ыкчам иш-чаралардын негизинде кылмышка шектелип 1982-жылы туулган Д.А. кармалып, убактылуу кармоочу жайга киргизилди.

Учурда тергөө иштери уланууда.

Автор: Жаңыл Ниязбекова