Ак-Босого конушунда жаңы сквер ачылды

Бүгүн, 1-июнда Ак-Босого конушунда жаңы сквер ачылды. Бул тууралуу Бишкек шаарынын мэриясынан билдирди.

Маалыматка ылайык, «Бишкекжарык», «Бишкекасфальтсервис» муниципалдык ишканалары тарабынан аянтка тротуарлар төшөлүп, отургучтар орнотулуп, шаарды жарыктандыруу үчүн 24 даана бетон негиздер, торшерлер жана лампалар орнотулду. Ошондой эле паркка сапаттуу жарыктандыруу орнотуу үчүн 320 метр электр зымдары тартылган.

"«Бишкекжашылчарба» муниципалдык ишканасынын жашылдандыруучулары тарабынан 200 жашыл көчөт отургузулду, анын ичинен: 130 ийне жалбырактуу дарак, 70 кайың жана 45 клен. Ошондой эле, 2500 м2 аянтка газон себилип, бир жылдык гүлдөрдөн клумба отургузулду", - деп билдирди мекемеден.

Бул сейил бактын ачылыш аземине шаардык муниципалитеттердин жетекчилери, шаар тургундар катышты.

Белгилей кетсек, сейил бакты куруу иштери Биринчи май районунун акимиаты менен биргеликте 2022-жылдын ноябрь айында башталган.

Аянтты куруу үчүн Миграция боюнча эл аралык уюмдун демөөрчүлүгүнүн аркасында керектүү материалдар сатылып алынган.

Автор: Гүлкайыр Бабаева
Фото: Бишкек мэриясы