"1 граммы 100 доллар". Бишкекте АКШдан келген баңгизатын алып жаткан жаран кармалды

АКШдан почта аркылуу "гашиш майы" деп аталган баңгизатын жеткирип келген туруктуу каналды иштетүүчү трансулуттук баңги топтун ишине бөгөт коюлду. Бул тууралуу Ички иштер министрлигинен билдирди.

Маалыматка ылайык, Кылмыш-жаза кодексинин 285-беренеси жана 282-беренеси боюнча козголгон кылмыш ишинин алкагында атайын тергөө амалдарынын жүрүшүндө, 11-майда Бишкек шаарында баңгизатын алып жаткан жеринен 1992-жылы туулган И.Р. аттуу жаран кармалган.

"Учурдагы ыкчам маалыматтарга ылайык, баңги каражаттары АКШдан азык-түлүк катары келип турган. Жалпы салмагы 970 граммдык "гашиш майынын" бир граммы 100 доллардан сатылат. Бул "гашиш майы" баңги каражаттары электрондук тамекилерге куюга даярдалган", - деп айтылат маалыматта.

Учурда бул кылмышка тиешеси бар башка адамдарды аныктоо аракеттери жүрүп жатканы кошумчаланды.

Автор: Бек Оморбеков
Фото: ИИМдин басма сөз кызматы