Оштун Кара-Суу районунун Кожо-Келең айылында жер көчкү кооптуулугу бар аймактан көчүрүлгөндөр чатыр менен камсыз болду. Бул тууралуу Өзгөчө кырдаалдар министрлигинен билдиришти.
"Папан айыл өкмөтүнүн кайрылуусунун негизинде 16-июнда ӨКМ тарабынан 10 орундуу 6 даана чатыр бөлүнүп берилип, коопсуз жерге орнотулуп берилди", - деп айтылат билдирүүдө.
Мындан тышкары, Улуттук Кызыл Ай коому тарабынан ар бир үй-бүлөгө күнүмдүк керектелүүчү эмеректер (идиш, кир жуучу каражаттар, жылытуу меши жана жууркан-төшөктөр) жеткирилип берилген.
Эскерте кетсек, 15-июнда аталган айылда эски жер көчкү жылып жатканына байланыштуу көчкү алдында калуу коркунучу бар 5 турак үйдөн 39 жаран коопсуз жайга эвакуацияланган.
Жер көчкү кайрадан активдешип, жер кыртышы 12-13 метрге чейин отура баштаган. Жер көчкүнүн болжолдуу көлөмү 10 000 метр кубду түзүүдө.