Алайдын Белекбаев айыл өкмөтүнө өзгөчө кырдаал режими киргизилди

Алай районунун Белекбаев айыл өкмөтүнө селге байланыштуу өзгөчө кырдаалдар режими киргизилди. Бул тууралуу Өзгөчө кырдаалдар министрлигинен билдиришти.

Маалыматка ылайык, бүгүн, 23-июнда саат 07:30дар чамасында селдин кесепеттерин жоюуга Алай райондук №68 Өрткө каршы куткаруу бөлүгүнөн 15 куткаруучу тартылды.

Түзүлгөн кырдаалга байланыштуу тактоо, авариялык-куткаруу иштерин жүргүзүү, кечиктирилгис иш-чараларды өз убагында аткаруу максатында Белекбаев айыл өкмөтүнө өзгөчө кырдаал режими киргизилди.

Белгилей кетсек, 21-июнь күнү кечке маал аймакта катуу жаандын кесепетинен 45 турак үйдүн короо-сарайларын, 3 социалдык объектинин (1 мектеп, балдар бакчасы, ФАП) короолорун кум шагыл аралаш сел суулары каптаган жана бир электр мамысын сел агызып кетип, электр берүү убактылуу токтотулган. Сопу-Коргон - Терек ички чарбалык жолунун 7 чакырымында 3 тилкеде сел калдыктарынан улам жол каттамы үзгүлтүккө учураган.

Автор: Гүлкайыр Абдиманнап кызы