Кыргызстан Орусиядан көп максаттуу Ми-17 тик учагын сатып алды (фото)

Кыргызстан Орусиядан сатып алган Ми-17 тик учагы өлкөгө алынып келинди. Бул тууралуу Коргоо министрлигинен кабарлашты.

Тик учакты өткөрүп берүү иш-чарасына коргоо министри Бакытбек Бекболотов, Казань тик учак заводунун өкүлдөрү, ошондой эле Куралдуу Күчтөрдүн Абадан коргонуу күчтөрүнүн командачылыгы жана өздүк курамы катышты.

Аземдин жүрүшүндө Бакытбек Бекболотов көп максаттуу Ми-17 тик учагы Кыргыз Республикасынын Куралдуу Күчтөрүнүн алдында коюлган тапшырмаларды аткарууга бир нече мүмкүнчүлүгүн жогорулатарын белгиледи.

Учуучу техника Кыргызстанга Ил-76 учагы менен жеткирилип, Казань тик учак заводунун өкүлдөрү тарабынан чогултулуп, учкуч-сыноочулар учууларды өткөрүштү.

Белгилей кетсек, аталган техниканы сатып алуу үчүн акча каражаты республикалык бюджеттен бөлүнгөн.

Автор: Азат Бейшенбеков