“Аялы менен урушуп кетип батирин өрттөгөн". Королёвдогу өрттөн 2 адам каза болду (видео)

Орусиянын Королёв шаарында аялы менен урушуп кеткен жаран батирин өрттөп, жыйынтыгында эки адам каза болду. Бул тууралуу аталган өлкөнүн жергиликтүү басылмалары жазып чыгышты.

Маалым болгондой, окуя 25-июнда Королёв шаарындагы Пионерск көчөсүндө жайгашкан көп кабаттуу үйдүн 14-кабатындагы батиринде болгон. Анда белгисиз жаран аялы менен урушуп кетип, аны бычак менен сайып жиберген.

Андан соң аялды сыртка чыгарып, батирди өрттөп жиберген. Өрттүн кесепетинен 14-15-кабаттагы батирлер күйүп, жанаша жайгашкан батирдеги тургун менен аны куткарууга аракет кылган өрт өчүрүү кызматкери 14-кабаттан кулап түшкөн. Жыйынтыгында, окуя болгон жерде экөөсү тең каза болгон.

Аталган факты боюнча Кылмыш-жаза кодексинин 109-беренеси менен («Байкабастыктан эки же андан көп адамдын өлүмүнө алып келүү») өрт чыгарган жаранга кылмыш иши козголгон. Учурда тергөө иштери жүрүп жатат.