Арча-Бешик конушунун абоненттеринин суу үчүн төлөмү кайра эсептелди

Бишкектеги Арча-Бешик жаңы конушунун абоненттеринин ичүүчү сууга төлөмү кайра эсептелди. Бул тууралуу мэриянын басма сөз кызматы билдирди.

Маалыматка ылайык, июнь айында "Бишкек суу канал" башкармалыгы ичүүчү суунун жетишсиздигинен улам Арча-Бешик жаңы конушундагы 5 миң 504 абоненттин төлөмдөрүн кайра эсептеп чыкты.

Анын ичинен 1 400ү чарбалык тилкелерди түнкү сугаруу кызматына төлөшкөн. Бул каражаттар муздак суу жана канализация үчүн кийинки абоненттик төлөмдөргө которулат.

Белгилей кетсек, аталган конушта 7 миң 72 абонент жашайт. Кайра эсептөө 5 миң 504 абонентке жүргүзүлгөн. Ал эми калган 1 568 абонентке ичүүчү сууга чектөө киргизилген эмес.

Автор: Айпери Бакталбек кызы
Фото: Интернеттен алынды