Аткезчилик жол менен өлкөгө алынып келе жаткан 3 тоннадай жүзүм жана алчага бөгөт коюлду

Баткендин Кадамжай районунда жалпы салмагы дээрлик 3 тоннага жакын жүзүм менен алчаны мыйзамсыз алып келүү фактысы аныкталды. Бул тууралуу бүгүн, 4-июлда Мамлекеттик бажы кызматынан билдиришти.

Маалыматка ылайык, Кадамжай районунун Кызыл-Булак айылында Баткен бажысынын контрабандага жана бажы эрежелерин бузууга каршы күрөшүү бөлүмүнүн кызматкерлери тарабынан Кыргыз жараны Ж.К.нын башкаруусундагы Volkswagen LT 46 үлгүсүндөгү унаа текшерүүгө алынган.

"Текшерүүдө унаанын жүк бөлүгүнөн ар бири 7,5 килограмм салмактагы 15 коробкада жүзүм, 357 кутуда 7,9 килограмм алча табылган. Жүктүн бажылык тариздөөдөн өткөндүгүн тастыктаган документтери жок болгон", - деп жазылат маалыматта.

Кармалган товардын жалпы салмагы 2938,8 килограммды түзсө, ал эми орточо базар баасы 438 миң 795 сомду түзгөн.

Аталган факты боюнча чогулган материалдар бажы кызматынын контрабандага жана бажы эрежелерин бузууга каршы күрөшүү башкармалыгынын бажылык иликтөө секторунда каралууда.