Казакстандын түштүгүндө аскадан кулап кеткен турист изделүүдө

Казакстандын түштүгүндө 56 жаштагы турист аскадан кулап кетип, изделип жатат. Бул тууралуу аталган өлкөнүн жергиликтүү басылмалары жазып чыгышты.

Маалым болгондой, окуя 3-июлда "Сайрам-Угам" улуттук жаратылыш паркынын аймагында болгон. Анда 3 адам деңиз деңгээлинен 4 миң 236 метр бийиктикте жайгашкан "Сайрам" чокусуна чыгышкан. Аскадан түшүп келе жатып, 56 жаштагы кишинин жиби үзүлүп кетип, эңкейишти көздөй кулап кеткен.

Кечээ, 5-июлда аба ырайынын бузулушунан улам куткаруучулар издөө иштерин жүргүзө алган эмес. Бүгүн 8 куткаруучу менен 4 альпинисттин альпинисттик жабдуулар, спутниктик телефондор, радио байланыш жана үч күндүк тамак-аш менен камсыздалып, издөө иштерине жөнөтүлгөнү айтылды.

Автор: Ширин Марат кызы