Өзбекстанга аткезчилик жол менен тамеки алып өтүүгө аракет кылгандар кармалды

Өзбекстанга аткезчилик жол менен тамеки алып өтүүгө аракет кылган жарандар кармалды. Бул тууралуу бүгүн, 8-июлда УКМКнын басма сөз кызматынан билдирди.

"4-6-июль күндөрү Жалал-Абад облусунун Кербен шаарындагы кыргыз-өзбек чек арасындагы "Мамай" тилкесинде жана Аксы районунун Кош-Дөбө айылында 31 кутуга салынган 15 миң 500 таңгак өлчөмүндөгү (Milano маркасындагы) тамеки буюмдары түрүндөгү контрафакттык товарды Өзбекстандын аймагына алып өтүүгө аракет кылган 1981-жылы туулган С.Н.Т. жана 1987-жылы туулган К.К.И. аттуу Кыргыз жарандары кармалды",- деп айтылат маалыматта.

Бул фактылар боюнча Кылмыш-жаза кодексинин 231-беренесинин 1-бөлүгү (Экономикалык контрабанда) жана 239-беренесинин (Милдеттүү акциздик салык салынуучу продукцияларды акциздик маркалары жана идентификациялоо каражаттары жок жүгүртүү) негизинде кылмыш иши козголду.

Учурда тергөө иш-чаралары жүрүп жатканы кошумчаланды.

Ошондой эле атайын кызмат жарандардан ушул сыяктуу фактылар жана башка укук бузуулар боюнча маалыматтар болсо, УКМКнын башкы башкармалыгынын нөөмөт бөлүмүнүн (03722) 5-60-49, (03722) 5-49-61 телефондоруна кайрылууну өтүндү.

Автор: Бек Оморбеков
Фото: УКМКнын басма сөз кызматы