Бишкектин Ала-Тоо конушунда заманбап спорт аянтчасы ачылды

Бишкектин Ала-Тоо конушунда жаңы спорт аянтчасы ачылды. Бул тууралуу бүгүн, 10-июлда Бишкек шаардык мэриясынан билдиришти.

Спорт аянтчасынын ачылышына Бишкек шаардык кеңешинин депутаттары, Капиталдык курулуш башкармалыгынын жетекчисинин орун басары, Ленин районунун акиминин орун басары жана жергиликтүү тургундар катышышты.

Чакырылган коноктор балдарды жана шаар тургундарын заманбап, көп функционалдуу аянтчанын ачылышы менен куттуктап, жаңы аянтчадагы жабдуулардын абалы тургундардын кылдат жана камкор мамилесинен көз каранды экенин белгилешти.

Жаңы аянтча тиешелүү спорттун түрлөрү менен жабдылган. Анда футбол, волейбол, баскетбол аянтчалары, балдар аянтчасы, воркаут зонасы, шахмат, чуркоо үчүн аянтчалар жана унаа токтотуучу жай камтылган. Аянтчанын жалпы аянты 0,8373 гектарды түзөт.

Автор: Жанбулат Жумабеков
Фото: Бишкек мэриясы