Ат-Башыда аты табылып өзү дайынсыз жоголгон жигиттин сөөгү табылды

Ат-Башы районунда буга чейин дайынсыз жоголгон 21 жаштагы жигиттин жансыз денеси табылды. Бул тууралуу өзгөчө кырдаалдар министрлигинен кабарлашты.

Маалыматка ылайык, райондук суу чарба башкармалыгы Ак-Моюн айылындагы суу көзөмөлдөөчү каналында адамдын сөөгү жатканын кабарлаган.

Саат 18:09да куткаруучулар 21 жаштагы Э. уулу А. аттуу жигиттин сөөгүн суудан чыгарып, милиция кызматкерлерине өткөрүп беришти.

Белгилей кетсек, аталган тургун ушул жылдын 7-июлунда Ак-Сай өрөөнүнө кеткен. Анын аты Ача тилкесинен табылып, өзү дайынсыз болгондугу тууралуу маалымат 102 кызматына түшкөн. Жоголгон адамды бүгүн издөөгө жалпысынан 12 адам чыгышкан.

Автор: Азат Бейшенбеков