Кандай учурда "балага сүйүнчү" берилбейт? Министрликтин жообу

Жарандар балдарына жөлөк пул чыгарууда ар кандай тоскоолдуктарга учурап жаткандыктарын айтып келишет. Буга байланыштуу Эмгек, социалдык камсыздоо жана миграция министрлиги "Балага сүйүнчү" темасындагы коомчулукту кызыктырган суроолорго жооп берди.

- “Балага сүйүнчү” төлөмүн ким ала алат?

- Кыргыз Республикасында төрөлгөн балдар (толук мамлекеттик камсыздоодо болгон балдардан тышкары).

- “Балага сүйүнчү” өлчөмү канча?

- “Балага сүйүнчүнүн” өлчөмү ар бир балага 4000 сомду түзөт;

- Бир мезгилде үч же андан көп бала төрөлгөн учурда, “балага сүйүнчү” ар бир балага 50 миң сом өлчөмүндө төлөнөт.

- Арызды кайсы жерге берсе болот?

- Калкты тейлөө борборлоруна (КТБ);

- Жарандык абал актыларын каттоо органдарына.

- Арызды ким берсе болот?

- бала менен жашаган ата-энесинин бири;

- бала менен жашаган камкорчу;

- бала менен жашаган асырап алган адам;

- ишеним каттын негизинде ишенимдүү адам.

“Балага сүйүнчү” Кыргызстанда жашап жаткан адамдарга чектелет:

- Кыргыз Республикасынын жарандарына;

- кайрылман күбөлүгү бар этникалык кыргыздарга;

- балдары бар үй–бүлөлөргө социалдык жөлөк пулду, компенсациялык төлөмдөрдү жана алименттерди берүү чөйрөсүндөгү жарандардын кепилденген укуктары жөнүндө макулдашуунун катышуучу–мамлекеттин чет өлкөлүк жарандарга: Орусия, Молдова, Тажикстан, Армения, Украина, Казакстан, Беларусь, Өзбекстан.

- “Балага сүйүнчүнү” чектөө үчүн өзгөчө шарттар барбы?

- “Балага сүйүнчү” үчүн арыз бала төрөлгөн күндөн баштап алты ай ичинде тапшырылышы керек;

- Ушул мөөнөттөн кеч кайрылган учурда “балага сүйүнчү” чектелбейт.

- Кайсы документтерди тапшыруу керек?

- арыз ээсинин паспорту;

Эгерде арызды камкорчу же ишенимдүү адам тапшырса, анда кошумча документ талап кылынат:

- Камкорчу үчүн – балага камкорчу дайындоо жөнүндө соттун чечиминин көчүрмөсү;

- Ишенимдүү адам үчүн – жарандык мыйзамдарга ылайык таризделген ишеним кат;

Зарыл болгон учурда:

- Кайрылмандын күбөлүгүнүн көчүрмөсү (кайрылмандар үчүн);

- баланын ата-энесинин жашап туруу укугунун көчүрмөсү (чет өлкөлөрдүн жарандар үчүн).

Арыз ээси арызда көрсөтүлгөн маалыматтын тууралыгын текшериши керек, андан кийин өзүнүн колун коюш керек. Акча каражаты арыз берилген күндөн 2 иш күнүнүн ичинде банктык эсепке түшөт.

Эскертүү: Банкка которулган акча каражаттары алты айдын ичинде алынбаган учурда Республикалык бюджеттин эсебине кайтарылат;

Жарандар арыз толтурууда уюлдук телефон номерди туура көрсөтүү зарыл, себеби акча каражаты которулгандан кийин байланыш номерлерине смс – билдирүү банк аркылуу жөнөтүлөт.

Автор: Айпери Бакталбек кызы
Фото: Интернеттен алынды