Бишкекте "мефодрон" баңгизаты менен эки жигит кармалды (видео)

Бишкекте 7 килограммга жакын "мефедрон" менен эки жаран кармалды. Бул тууралуу Ички иштер министрлигинен билдиришти.

Маалым болгондой, ушул жылдын 17-майында жүргүзүлгөн ыкчам-издөө иш-чараларынын жүрүшүндө эл аралык баңги тобунун мүчөлөрү Нарын облусунун 2003-жылы туулган М.Ж. жана Талас облусунун 2002-жылы туулган А.У. аттуу тургундары кармалды.

"Издөө иштеринин жүрүшүндө алар Бишкектеги батирине жашыруучу жайы бар 3 даана вибрациялык мотор алып келгени белгилүү болду. Текшерүү учурунда вибрациялык мотордон болжол менен салмагы 5 килограмм 943 граммды түзгөн 24 таңгактагы жана скотч менен таңгакталган 1 килограмм өлчөмүндөгү "мефедрон" психотроптук заты табылды. Ошондой эле кармалган жарандардын ишмердүүлүгүн мессенжер аркылуу чет өлкөдөн кураторлор көзөмөлдөп турганы аныкталды", - деп айтылат маалыматта.

Министрликтен билдиришкендей, шектүүлөр жогоруда аталган психотроптук затты сатуудан болжол менен 38 миллион 186 миң 500 сом мыйзамсыз киреше көрүүнү максат кылган.

Аталган факты боюнча Кылмыш-жаза кодексинин 282-беренеси (Баңги каражаттарын, психотроптук заттарды жана алардын аналогдорун сатуу максатында мыйзамсыз даярдоо) боюнча кылмыш иши козголду. Учурда бул кылмышка тиешеси бар башка адамдарды аныктоо боюнча кошумча атайын ыкчам иликтөө иш-чаралары жүргүзүлүүдө.