Кара-Сууда 17 кой сатканы кеткен бойдон дайынсыз жоголгон жаран байланышка чыкты. Бирок жүргөн жери белгисиз

Кара-Суу районунда мал сатканы базарга кеткен бойдон дайынсыз жоголгон жаран туугандарына байланышка чыкты. Бул тууралуу бүгүн, 31-июлда Ош ОИИБинен билдиришти.

Буга чейин Ош облусунун Кара-Суу районундагы Большевик айылынын тургуну 1979-жылы туулган Жолдошов Элдарбек Искендербекович 23-июль күнү саат 05:00 чамасында өзү жашаган үйүнөн чыгып кеткен боюнча дайынсыз жоголгон. Ал Учкун айылындагы мал базарга 17 баш кой сатканы кеткенин айтып, карындашы Кара-Суу райондук ички иштер бөлүмүнө арыз менен кайрылган.

Аталган окуя боюнча Ош ОИИБине байланышканыбызда дайынсыз жоголгон жаран үй-бүлөсүнө телефон аркылуу байланышка чыкканын билдиришти.

"Үй-бүлөсүнө байланышка чыкканы аныкталды. Бирок кайсы жакта жүргөнү белгисиз бойдон калууда. Кызматкерлер издөө иштерин жүргүзүп жатышат. Колубузда жетиштүү далил жок болгондугуна байланыштуу азыр так маалымат бере албайбыз", - дешти мекемеден.

Милиция жакынкы арада толук маалымат берилерин белгиледи.

Автор: Жанбулат Жумабеков
Фото: Ош ОИИБи