Ошто жарандарга үй алып берем деп алдап кеткен шектүүлөр кармалды

Ош шаарында "Араб фондунан" үй алып беребиз" деп жарандарды 75 миллион сомдон ашык акчага алдап кеткен үч шектүү кармалды. Бул тууралуу бүгүн, 1-августта Ош шаардык Ички иштер башкы башкармалыгынан билдиришти.

Маалым болгондой, бүгүнкү күнгө карата милицияга 74 адамдан арыз түшкөн. Жабырлануучулардын саны андан да көп болушу мүмкүн деп болжолдонууда.

Ага ылайык, шылуундарга алданып калган жарандардын ичинен эң аз акча бергени 350 миң сом болсо, эң көбү 11 миллион сомду түзөт. Шылуундар 350 миң сом берген адамга Монуев көчөсүндөгү өздөрү алдын ала ижарага алган батирди көрсөтүп, "ушул батирди беребиз" деп акчасын алышкан. Ал эми, 11 миллион сом берген жаранга Ош шаарынан көп кабаттуу үйдөн батир, дүкөн жана жер үй убада кылышкан.

Жабыркаган жарандардын көпчүлүгү Ош шаарынын, Ош, Баткен облустарынын тургундары болушат.

Милиция кылмышка шектүү катары 28 жаштагы М.А, 38 жаштагы С.Г. жана 39 жаштагы Н.К. аттуу жарандарды кармаган. Шектүүлөр 24-июлда колго түшүрүлүп, убактылуу кармоочу жайга камакка алынган. Бирок 26-июлда Ош шаардык соту үч шектүүнү тең үй камагына чыгарган.

Учурда шектүүлөрдүн үстүнөн «алдамчылык» беренеси боюнча тергөө иштери уланууда.

Ош шаардык милициясы шектүүлөрдүн кылмыштуу аракеттеринен жабыр тарткан жарандарды тергөө кызматына кайрылуусун суранат.

Автор: Гүлкайыр Абдиманнап кызы