Пакистанда темир жол кырсыгынан 30 адам көз жумду (видео)

Пакистанда жүргүнчү ташыган поезд кырсыкка учурап, 30 адам каза болду. Бул тууралуу The News басылмасы жазып чыкты.

Маалыматка караганда, кырсык, кечээ, 6-августта Пакистандын түштүгүндөгү Синд провинциясынын борбордук бөлүгүндө жайгашкан Сангар районунда болгон. Поезд Хавелияндан Карачи аймагына бара жаткан. Окуядан кийин облустун ичиндеги поезддердин кыймылы токтотулган.

Кырсыкка жүргүнчү ташыган поезддин 10 вагону рельстен чыгып кетиши себеп болгон. Учурда каза болгондордун саны 30дан ашып, 80ден ашык жарандын жаракат алганы айтылууда.

Басылманын маалыматына караганда, куткаруу иштерине полиция жана армия тартылып, Сангхара ооруканаларында өзгөчө кырдаал режими жарыяланган.

Ал эми кырсык боюнча Пакистандын темир жол жана авиация министри Хаваджа Саад Рафик маалымат жыйын берип, кимдир бирөө кырсыкты “атайылап” уюштурушу мүмкүн экенин же техникалык мүчүлүштүктөр себеп болгонун билдирген.

Учурда издөө-куткаруу иштери уланып жатканы айтылууда.

Белгилей кетсек, былтыр июнь айында да Пакистанда поезд кеырсыгы болуп, анда 63 адам каза тапкан.