Белгилүү балбан Роман Власов Белградда өтө турган дүйнө чемпиондугуна катышпайт

Грек-рим күрөшү боюнча олимпиаданын 2 жолку, дүйнөнүн 3 жолку чемпиону Роман Власов Белградда өтө турчу дүйнө чемпиондугуна катышпайт. Бул тууралуу күрөш боюнча орус улуттук курама командасынын башкы машыктыруучусу Гоги Когуашвили билдиргенин чет элдик спорт басылмалары жазды.

"Роман дүйнө чемпиондугуна катышпайт. Биз аны менен сүйлөшүп, быйылкы мелдешке катышпайбыз деп макулдаштык. Келерки жылы олимпиадалык курамга кирүү үчүн Романда бардык мүмкүнчүлүктөр бар. Бирок Роман машыгууларда биз менен чогуу болот. Анын командада болушу жана тажрыйбасы жаштарды шыктандырып турат", - деп бидирген ал.

Машыктыруучу ошондой эле 77 килограмм салмакта Сергей Степанов, Сергей Кутузов жана Адлет Тюлюбаев ат салыша турганын, ал эми 82 килограмм салмак үчүн Ауэс Гонибов даярданып жатканын белгилеген.

Белгилей кетсек, күрөш боюнча дүйнө биринчилиги 16-сентябрдан 25-сентябрга чейин Сербиянын борбору Белград шаарында өтөт. Кыргызстандын күрөш федерациясы азырынча аталган мелдешке бара тургандардын тизмесин жарыялай элек.

Автор: Жанбулат Жумабеков