Италиядагы кеменин чөгүп кетиши: Каза болгондордун арасында кыргызстандыктар жок

Италиянын түштүгүндөгү Сицилия кысыгында кеме кыйрап, кеминде 41 мигрант каза болгон кырсыкта кыргызстандыктар жок. Бул тууралуу Тышкы иштер министрлигинен билдиришти.

"Кыргызстандын Италиядагы Элчилигинин алдын ала маалыматы боюнча 2023-жылдын 3-августунда болгон кеме кырсыгына учурагандардын тизмесинде Кыргыз жарандары жок", - деп айтылат маалыматта.

Эске салсак, 3-августта Тунистен сүзүп чыккан кемеде жалпы 45 адам болгон. Италияга жакын Сицилия кысыгына жеткенде кеме кырсыктап, чөгүп кеткен. Андан 41 адам каза болуп, аман калган 4 адамды жакын жерде жүргөн кемедегилер куткарып калган.

Автор: Ширин Марат кызы