Бишкекте кафедеги мушташ: ИИМ 3 кишини кармады

Бишкек шаарындагы кафеде чыккан мушташ боюнча териштирүү иштери жүрүп жатат. Бул тууралуу Ички иштер министрлиги маалымдады.

Андагы маалыматка ылайык, 3-август күнү милицияга О.Р. аттуу жаран арыз менен кайрылган. Арызында ал Сухэ-Батор көчөсүндө жайгашкан кафелердин биринде саат 23:00 чамасында белгисиз адамдар коомдук тартипти бузуп, күч колдонуп, денесине залал келтиргендигин билдирген.

Бул факт Бишкек шаарынын Октябрь РИИБдин маалымат электрондук журналына катталып, тергөө иштери башталды.

Иликтөөнүн жүрүшүндө Тергөө кызматына 1993-жылы туулган М.С., 1998-жылы туулган М. Э. жана 1995-жылы туулган М. Э. аттуу жарандар жеткирилген.

Тергөөгө чейинки текшерүүнүн алкагында бардык зарыл экспертизалар дайындалып, анын жыйынтыгында тиешеси бар адамдардын аракеттерине тийиштүү юридикалык баа берилет.

Учурда тергөө иштери жүрүп жатат.

Автор: Азат Бейшенбеков