Дүйнө чемпиондугу: Калмира Билимбек кызы коло медаль тагынды

Кыргызстандык спортчу Калмира Билимбек кызы Иорданияда өтүп жаткан 20 жашка чейинки (U20) балбандар арасындагы дүйнө чемпиондугунда коло медаль тагынды.

Балбан кыз 59 килограмм салмакта килем үстүнө 16-августта чыгып, таймашты квалификациялык айлампадан баштаган. Биринчи кармашында ал өзбекстандык спортчуну 11:1 эсебинде жеңди. Андан кийин 1/8 финалда казакстандык балбан кызды 8:1 эсебинде утуп келе жатып, далысын килемге басып, таза жеңишке жетти. Чейрек финалда ал япониялык атаандашын 10:0 эсебинде уткан.

Бирок жарым финалдык беттеште Калмира Билимбек кызы бейтарап туунун алдында чыгып жаткан Алеся Гетмановага 4:6 эсебинде жеңилип, коло байге үчүн күрөшө турган болгон.

Үчүнчү орун үчүн болгон беттеште түркиялык балбан кызды 11:0 эсебинде утуп алды.

Бул дүйнөлүк чемпионатта (U20) Кыргызстандын курама командасынын биринчи медалы.

Автор: Айпери Бакталбек кызы