Ала-Арча капчыгайында бутун кокустатып алган чет элдик туристтерге жардам көрсөтүлдү

Өзгөчө кырдаалдар министрлигинин кызматкерлери Ала-Арча капчыгайында бутун кокустатып алган чет элдик туристтерге жардам көрсөтүштү. Бул тууралуу аталган министрликтин маалымат кызматы билдирди.

Ага ылайык, кечээ, 21-августта Аламүдүн районунун Ала-Арча капчыгайындагы Жарылган-Жүрөк тоосунда украиналык 67 жаштагы Ж.Н. аттуу жараны жана капчыгайдагы шаркыратмага жакын жерден Чехия өлкөсүнүн 71 жаштагы К.Д аттуу жараны буттарын кокустатып алышкан.

Жерине Бишкек шаардык куткаруу кызматынан 6 куткаруучу чыгышканы айтылат.

"Куткаруучулар жеткенге чейин украиналык туристти "Ала-Арча" улуттук жаратылыш паркынын кызматкерлери "Тез жардам" кызматкерлерине өткөрүп беришкен.

Ал эми Чехия өлкөсүнүн жаранын куткаруучулар тоодон түшүрүп, №4 шаардык клиникалык ооруканасына жеткирип беришкен", - деп жазылат анда.

Учурда чет өлкөлүк аял туристтердин абалы канааттандырарлык экени маалымдалат.

Автор: Каныкей Амантаева