Жогорку сот Украинадагы согушка катышкан Аскар Кубанычбек уулунун арызын карады

Украинадагы согушка катышкан деген айып менен 10 жылга соттолгон Аскар Кубанычбек уулунун арызы Жогорку сотто бүгүн, 22-августта каралып, кийинки отурум 30-августка белгиленди. Бул тууралуу Жогорку соттон билдиришти.

Маалым болгондой, ушул жылдын 16-майында Бишкектин Биринчи Май райондук соту Украинадагы согушка Орусия күчтөрүнүн катарында катышканы үчүн айыпталган Аскар Кубанычбек уулун 10 жылга соттогон.

Ага ылайык, апелляциялык арызды караган Бишкек шаардык соту 7-июнда ушул эле чечимди күчүндө калтырган. Муну менен Кыргызстанда биринчи жолу Украинадагы согушка аралашкан жаран жазага тартылды.

Белгилей кетсек, Аскар Кубанычбек уулу ушул жылдын январь айында атасынын ооруп калганын угуп Кыргызстанга келгенде атайын операцияга катышкан деп камакка алынган. Сотто ал согуш талаасына өз ыктыяры менен барганын, Орусиянын жарандыгын алууну каалап жүргөнүн билдирген.