Быйыл Таласта жыл аягына чейин 8 мектеп курулуп бүтөт

Быйыл Таласта окуучулар үчүн курулуп жаткан мектептердин сегизи жыл аягына чейин бүткөрүлөт. Бул тууралуу бүгүн, 24-августта Мамлекеттик архитектура, курулуш жана турак жай-коммуналдык чарба агенттигинин директору Мырзабек Жыпаркулов билдирди.

Анын айтымында, Таласта жаңы окуу жылына карата 2 мектеп колдонууга берилет.

"Келечек үмүтү болгон балдарыбыз үчүн Таласта курулуп жаткан мектептердин экөөсү сентябрь айында даяр болот. Мындан сырткары, 2023-жылдын аягына чейин курулуш-план боюнча дагы 6 мектеп толук бүтөт", - деп жазган ал өзүнүн Фейсбук баракчасына.

Ошондой эле ал өлкө боюнча жаңы, заманбап жана ыңгайлуу 100 мектеп жыл аягына чейин курулуп, толук бүтө тургандыгын жазды.

Автор: Гүлкайыр Абдиманнап кызы