Кыргызстан менен Палестинанын тышкы иштер министрлери бир катар келишимдерге кол коюшту

Кыргызстандын тышкы иштер министри Жээнбек Кулубаев менен Палестинанын тышкы иштер министри Рияд Аль-Малики эки тараптуу келишимдерге кол коюшту. Бул тууралуу Тышкы иштер министрлигинин басма сөз кызматы билдирди.

Тараптар төмөнкү документтерди бекитти:

1. Кыргыз улуттук "Кабар" маалымат агенттиги менен Палестина Мамлекетинин WAFA-жаңылыктар жана маалымат агенттигинин ортосундагы кызматташуу боюнча өз ара түшүнүшүү меморандуму;
2. Министрлер кабинети менен Палестина мамлекетинин өкмөтүнүн ортосундагы маданият жаатында кызматташуу жөнүндө макулдашуу;
3. Айыл чарба министрлиги менен Палестина өлкөсүнүн Айыл чарба министрлигинин ортосундагы кызматташуу жөнүндө макулдашуу;
4. Эки өлкө ортосундагы саламаттыкты сактоо жаатында кызматташуу жөнүндө өз ара түшүнүшүү меморандуму;
5. Тышкы иштер министрлиги менен Палестинанын Тышкы иштер жана экспатрианттар министрлигинин ортосундагы саясий консультациялар жөнүндө протокол.

Белгилей кетсек, кечээ, 27-август күнү өлкөгө Палестинанын тышкы иштер жана экспатрианттар министри Рияд Аль-Малики иш сапары менен келген.

Эки мамлекеттин тышкы иштер министрликтеринин ортосундагы саясий кеңешмелер өтүп, анда эки өлкөнүн ортосундагы кызматташтыкты өнүктүрүүнүн кеңири чөйрөсү талкууланган.

Автор: Каныкей Амантаева